«Publiko» hitza defendatu beharreko kontzeptua eta erronka handia da gaur egun ere. «Publiko» hitzaren atzean dagoena, eta ez da gutxi, doako zerbitzu unibertsalen kalitatearen bermea da, eta pertsona guztien berdintasuna zerbitzu horien aurrean. Publikoak gizartea egituratu eta berdintzen du, pribatuak desberdintasuna sortzen duen bitartean. Zerbitzu publikoen kalitatea eta doakotasuna defendatzea eta horien pribatizazioaren aurka borrokatzea Euskal Herri igualitario baten oinarria da.
Hezkuntzaren arloan, funtzio hori Eskola Publikoak betetzen du, denona eta denontzat dena. Zerbitzu publiko doakoa eta unibertsala eskaintzen duen eskola eta gizartearekin duen konpromisoa betetzen duena bere gelak bereizketarik gabe betez eta aberastuz. Berritzailea den eskola, herri honen ikasleen kopuru handiena euskalduntzen duena, inklusiboa eta laikoa, eta ikasteko aukera berdinak bermatzen dituena ikasleen maila soziala edozein dela ere. Aniztasunean aberatsa den eskola, umeak “bezero” bihurtu gabe.
Sinistu egiten dugu hezkuntza publikoaren balioan, kalitatean oinarritutako eta hezkidetzari lotutakoa, jatorrizko ezberdintasunak berdintzen eta ikasle guztien hezkuntza integrala eta gizarte-kohesioa bermatzen dituena. Sinistu egiten dugu egunez egun atsedenik gabe lan egiten duten Euskal Eskola Publikoko irakasle eta langileengan, gure seme-alabek hezkuntza laikoa eta euskalduna izan dezaten. Sinistu egiten dugu gure jendartea integratzeko eta euskalduntzeko ezinbesteko elementu gisa haren aldeko apustua egiten duten familia guztiengan.
Horregatik guztiagatik, Euskal Eskola Publikoarekiko gure harrotasuna adierazi eta euskal hezkuntza-sistema osorako eskola bakarra aldarrikatu nahi dugu, herri bezala publikoaren, eskubide kolektiboen eta gure haur guztientzat aukera-berdintasunaren aldeko apustua eginez.
Etorkizunari begira, eta gure hizkuntzaren biziraupenaren eta gizarte-kohesioaren helburu bikoitzarekin, Eskola Publikoa bultzatu, lagundu, hobetu eta zaindu behar dugu, bertan baitago jokoan euskararen eta bizikidetzaren etorkizuna. Denok eskola publikora, gure eskola, herriaren eskola.
Maite Huarte eta Manolo Martínez
Euskal Eskola Publikoaren Aldeko Plataforma
